ናይ ተሃድሶ ታሪኽ 10ይ ክፋል

......ሕጂ ግና ናትና ልብን እዝንን ጌና ኣይተስተኻኸለን ዘሎ፡ መዝሙር ካብ ደርፊ ፈልዩ ክፈልጥውን ኣይከኣለን ዘሎ። ቋንቋና ኹሉ እኮ ተሓዋዊሱ እዩ። ትዝክሩ ዶ ቅዱስ ጴጥሮስ ሓዊ ክስሕን ኢሉ ምስ ቀረበ፡ እታ ኣብ ቤተ መንግሥቲ ዚነበረት ሠራሕተኛ መጺኣ “ንስኻ ናይቲ ክርስቶስ ዝበሃል ወደ መዝሙር ኢኻ ምሽ?” ምስ በለቶ፡ ኣይኮንኩን ኢሉ መለሰላ። ንሳ ግና “ንስኻ ወደ መዝሙሩ ኢኻ ዘረባኻ የፍልጠካ ኣሎ፡ ኣዘራርባኻ ናይ ሐዋርያት ኣዘራርባ እዩ” በለቶ። ሎሚ ውን ኣዘራርባና ዅሉ ካብ ፕሮቴስታንት ብፍጹም ዝፍለ ኣይኮነን። ወልድ ዋሕድ ኢልካ ምዝራብ እኳ ሎሚ ነውሪ ኾይኑ እዩ። ድንግል ማርያም እግዝእትነ ማርያም ኢልካ ምዝራብ እኳ ሎሚ ተሪፉ እዩ። ኢየሱስ ጐይታ እዩ ኢልና ካብ ንዛረበሉ ዘመን እኳ ሓሊፍና ኢና፡ ገለ ገሌና ኣብ ቤተ ክርስቲያንና ኢየሱስ ጐይታ እዩ ተባሂሉ ከም ናይ ፕሮቴስታንት ስለ ዘይተደጋገመ ወንጌል ዘይተሰበኸ ኮይኑ ዚስመዓና ሰባት ኣለና። ቤተ ክርስቲያንና ግና ኢየሱስ ጐይታ እዩ ካብ ምባል ሓሊፋ ደረጃኡ ተሳጊራ፡ ኣምለከ አማልክት፡ እግዚአ አጋእዝት፡ ወንጉሠ ነገሥት /ናይ ኣማልኽቲ ኣምላኽ፡ ናይ ጐይቶት ጐይታ፡ ናይ ነገሥታት ንጉሥ/ ኢላ እያ ብኽብሪ ትጽውዖ። እሞ ኸ ደኣ ኣየናይ ይበልጽ፡ ኢየሱስ ጐይታ እዩ ምባል ዶ ወይ ናይ ጐይቶት ጐይታ ምባል?

ውዳሴ ማርያም ምድጋም ወንጌል ዘይተሰበኸ ኮይኑ ዝስምዖም ሰባት እኳ ኣለዉ። ውዳሴ ማርያም ጽቡቕ ጌርኩም ምስ ትምርምርዎ ግና 63% ብዛዕባ ኢሱስ ክርስቶስ እዩ ዝዛረብ። ብዛዕባ ድንግል ማርያም 37% ሚእታዊት ጥራይ እዩ ውዳሴ ማርያም ዝዛረብ። ገና ኪጅምር ከሎ “ፈቀደ እግዚእ ያግዕዞ ለኣዳም ኅዙነ ወትኩዘ ልብ ወያግብኦ ኀበ ዘትካት መንበሩ ሰአሊ ለነ ቅድስት” ጐይታ ነቲ ኅዙንን ጉሁይ ልብን ኣዳም ናጻ ከውጽኦን ናብቲ ናይ ጥንቲ መንበሩ ክመልሶን ፈቐደ ኦ ቅድስት ለምንልና ብምባል እዩ ዝጅምር። እሞ እዚ ድዩ ወንጌል ኣይኮነን ዝበሃል? “ንሔዋን ነታ ተመን ዘስሓታ እግዚአብሔር ንሕማምክን ንጻዕርኽን ኣዝየ ከብዝሖ እየ እናበለ ኣብ ልዕሊኣ ምስ ፈረደ ልቡ ናብ ፍቕሪ ሰብ ስለ ዝሰመረ ናጻ ኣውጽኣ ኦ ቅድስት ለምንልና” ይብል፡፤ እሞ እዚ ኸ ወንጌል ኣይኮነን ድዩ? ካብዚ ንላዕሊ ወንጌል እንታይ ክኸውን ኢና ንደልዮ?

ኣቦታትና ሊቃውንት ሓደ ዝምስልዎ ምስላ ኣሎ፦ ሓረስታይ ንዘዕበዮ ብዕራይ ንዕዳጋ ሒዝዎ ይወርድ። እንዳ ሥጋ ድኳን ዘለዎም ድማ ነቲ ብዕራይ ገዚኦም ሓሪዶም ኣዋራሪዶም ብዓብን ብንእሽተይን ከፋፊሎም ኣብቲ እንዳ ሥጋ ይሰቕልዎ። ሰብ ሞያ ኣዴታት ድማ ከይደን ካብዚ ቁረጸለይ ኢለን ገዚአን ይወስዳ። ብድኅሪዚ ኣብ ቤት መግቢ ድማ ዝግኒ ጥብሲ ክትፎ ዝልዝል እናበሉ ይኸፋፍልዎ። ንሕና ድማ ኬድና ንበልዖ። ሕጂ እዚ ዝበላዕናዮ እቲ ካብ ሓረስታይ ዚተገዝአ ብዕራይ ድዩ ዋላስ ኣይኮነን? ሰባኺ ይሓትት፡ ሕዝቢ ድማ ብሕበረት “ንሱ እምበር” ኢሎም ይምልሱ። በሉ ፕሮቴስታንትን ተሃድሶን ሲ “ነቲ ብዓራይ ብደዉ ኸሎ ቆሪጽኩም እንተ ዘይበሊዕኩሞ፡ ሥጋ ከም ዝበላዕኩም ኣይሕሰብን እዩ እዮም ዝብሉ ዘለዉ። ንሕና ድማ ግደፉና እንዶ በጃኹም ክትፎና ዝግንና ጥብስና ክንበልዕ፡ ጥብሲ ንበሎ፡ ክትፎ ንበሎ፡ ዝግኒ ንበሎ፡ ዝልዝል ንበሎ፡ ኵሉ ንሱ እቲ ብዕራይ እዩ።

ጐይታና ንሐዋርያት ወንጌልን መልእኽትን እናበለ ኣይመሃሮምን፡ ንሱ ትምህርቲ እዩ ዝመሃረ። እቲ ትምህርቲ እዩ እምበኣር ብዕራይ ንብሎ ዘለና። ሐዋርያት ግና ነቲ መልእኽቲ መልእኽቲ ነቲ ወንጌል ወንጌል ነቲ ራእይ ራእይ እናበሉ፡ ከፋፊሎም ኣቐመጡልና። ሊቃውንት ድማ ከምተን ሰብ ሞያ ኣንስቲ ነዚ ሥጋ እዚ ወሲዶም፡ እዚ ምሥጢረ ሥላሴ እዩ፡ እዚ ምሥጢረ ሥጋዌ እዩ… እዚ ቅዳሴ እዩ፡ እዚ ሰዐታት እዩ፡ እዚ ድጓ እዩ እናበሉ፡ ጥብስን ክትፎን እናገበሩ ኣቕረቡልና። እሞ ሕጂ ንሕና ሥጋ ኣይበላዕናን ዲና ክንበሃል? ድጓ ወንጌል ኣይኮነን ድዩ? ምሥጢራተ ቤተ ክርስቲያን ክንመሃር ከለና ወንጌል ኣይኮነን ድዩ? ብምባል ሰባኺ ደጋጊሙ ንዝሓተቶ ሕቶ፡ ምእመናን ብሓንቲ ቃል ወንጌል እምበር ብምባል ይምልሱ። በሉ እዚ እዩ ከረዳድኣና ዘይከኣለ። ሊቃውንት ንወንጌል ኣመቓቒሮም እዮም ኣቕሪቦምልና። ንኣብነት ኣነ ሓደ ብዕራይ ኣብዚ ቅድሜኹም ኣምጺአ ብልዑ እንተ ዝብለኩም፡ እቲ ብዕራይ ክወግኣኩም እንተ ዘይኮይኑ ክትበልዑዎ ኣይትኽእሉን ኢኹም። ንሳቶም ግና ንወንጌል ከም ዝብላዕ ጌሮም እዮም ኣቕሪቦምልና። ጐይታና ንሐዋርያት ወንጌል ከጽሕፎም ከሎ፡ -“ማቴዎስ ንስኻ ወንጌል 27 ምዕራፍ ዘለዎ ጌርካ ጽሓፍ፡ ሉቃስ ካብ 24  ከይተሕልፍ፡ ማርቆስ 16 ግበሮ፡ ጳውሎስ 14 መልእኽቲ ጽሓፍ፡ ዮሐንስ 5 መጻሕፍቲ ይኣኽለካ፡ ይሁዳ ድማ ሓንቲ መልእኽቲ ትኣኽለካ እያ እናበለ ኣይኮነን ምሂሩዎም። ንሱ ትምህርቲ ጥራይ እዩ ምሂሩዎም። ንሳቶም ግና ከም ዝኸውን ጌሮም ኣቐመጥዎ። ብድሕሪኦም ዝመጽኡ ሊቃውንት ድማ፡ እዚ ተግሣፅ እዩ፡ እዚ ምኽሪ እዩ፡ እዚ መልእኽቲ እዩ። እዚ ቅኔ እዩ፡ እዚ መዝሙር እዩ እናበሉ ኣቐመጡዎ.....ይቕጽል