ታሪኽ ናይ ተሃድሶ 9ይ ክፋል

….እዚ ናይ ቤተ ክርስቲያን ትምህርቲ ድዩ? ግሸን ክንከይድ ከለና ከምዚ ዲና ተማሂርና?! ኣይኮንናን!  ኣወዳት ዘይኣትውዎም ገዳማት ኣለዉ፡ ደቂ ኣንስትዮ ዘይኣትዋኦም ገዳማትውን ኣለዉ። ኣብ ሰሜናዊ ክፋል ናይ ኢትዮጵያ ንደቂ ኣንስትዮ ጥራይ ዚተፈቐዱ ደቂ ተባዕትዮ ዘይኣትዉዎም ገደማት ኣለዉ።..ናይ ደቂ ተባዕትዮ ገዳም ድማ ደቂ ኣንስትዮ ኣይኣትዋኦን እየን። ኣብ ከምዚ ዝበለ ቦታ ድማ ግዘት ኣሎ ቃል ኪዳን ውን ኣሎ፡ ከምዚ ኢልካ ምምሃር ሓደ ነገር እዩ። ንሳቶም ግና ሰባት ነቲ ሥርዓት ከም ዘቃልልዎን ከም ዝንዕግዎን ንምግባር ዝጥቀሙሉ ሓደ ሜላ እዚ እዩ። ኣብ መዝሙሮም ኣብ ስብከቶምን መጽሔቶምን ነንብቦ ዘለናውን እዚ እዩ። ኣቐድም ኣቢሉ መምህር ዘመድኩኝ ዝነገረና ሓደ ነገር ኔሩ፡ “ናትና ኣቦታት ሳንቲም ሓጨል ክብል ተሰሚዖም ይትንሥኡ፡ ወንጌል ክድወል ምስ ዝሰምዑ ድማ ይድቅሱ” ዝብል ትምህርቲ ተሰሚዑ ኣሎ፡ ናይ ብሓቂ ግና ኣቦታትና ሳንቲም ሓጨል ክብል ሰሚዖም ዚነቕሑ፡ ወንጌል ክድወል ሰሚዖም ዝድቅሱ ኣቦታት ድዮም? ኣይኮኑን። እዚ ኵሉ ጸለመ ግና ሕዝቢ ንኣቦታት ከም ዝንዕቕን ከም ዘቃልልን ንምግባር ዝጥቀሙሉ ሜላ እዩ። ሕጂ ናይ መወዳእታ ንቤተ ክርስቲያን ንምስዓር ዚተወሰደ ሜላ እምበኣር እዚ እዩ፡ ምቅላል።

ስለዚ ምርስሳዕ 1ይ ሜላ እዩ

ምቅላል 2ይ ሜላ እዩ

ሣልሳይ ሜላ ድማ ልክዕ ኣብ ናይ ኣርመንያ ቤተ ክርስቲያን ከም ዚተገበረ፡ ሕዝቢ ካብ ቤተ ክርስቲያን ከም ዝወጽእ ምግባር እዩ። እግዚአብሔር ነዛ ቤተ ክርስቲያን እዚኣ ተኸላኺሉ ደኣ ኣትሪፉልና እምበር እዚ ናይ ኣዳራሽ ጉባኤ ቀጺሉ እንተ ዝኸውን ንሕናውን ሎሚ ኣብዚ ዘለናዮ ቀጽሪ ቤተ ክርስቲያን ኣይምተረኸብናን ኔርና። ንሕና ኣብዚ ዓውደ ምሕረት እዚ ምርካብና እኮ ብዙኅ ጥቕሚ እዩ ዘለዎ። ካልእሲ ይትረፍ ኣብ ጉባኤ ኣብ ትምህርቲ ኣብ ቅዳሴ ናይ ኣጋንንት መንፈስ ዚነበሮም ሰባት ኣብ ቀጽሪ ቤተ ክርስቲያን ክበጽሑ ኸለዉ ክጭድሩ ዶ ሰሚዕኩም ትፈልጡ? እወ ንሰምዕ፡ እሞ እዚ ኣብ ኣዳራሽ ይስማዕ ድዩ? ኣይስማዕን እዩ። ምኽንያቱ ኣብዚ ናብ ታቦት ዝወርድ ጸጋ መንፈስ ቅዱስ ኣሎ፡ ኣብ ኣዳራሽ ግና እዚ መንፈስ እዚ የልቦን። ናብዚ ክንመጽእ ከለና መንደቕ ተሳሊምና ኢና ንኣቱ፡ ኣብኡ ግና ምስላም የልቦን። ኣብዚ ምጽዋት ለጊስና ኢና ንምለስ ኣብ ኣዳራሽ ግና እዚ የልቦን። ኣብዚ ክንኣቱ ኸለና ቤተ ክርስቲያን ተኸፊቱ ኣብ ቅድሚ ሥዕሊ ኴንና ንጽሊ ኣብ ኣዳራሽ ግና እዚ የልቦን። ነዚ ኵሉ ነገራት እናቃለሉ ሰብ ካብ ቤተ ክርስቲያን ከም ዝርሕቕ ይገብሩዎ። ብፍላይ ድማ ንሕፃናትን መንእሰያትን፡ ኣነ ናታትኩም ናይዞም ዓበይቲ ኣቦታትን ኣዴታትን ኣይኮነን ዘሕስበኒ ዘሎ፡ ምኽንያቱ ንስኻትኩም ናይ ቤተ ክርስቲያን ትምህርቲ ተማሂርኩም ኢኹም፡ ናይ ቤተ ክርስቲያን ታሪኽ ተማሂርኩም ኢኹም፡ እናዘርኩምውን ንዅሉ ተዓዚብኩምዎ ኢኹም።

ሕፃናት ንኣሽቱ ደቅና ናብ ቤተ ክርስቲያን ኣምጺእና መስቀል ካህናት እንተዘይ ኣሳሊምኖዮም፡ ቤተ ክርስቲያን ኣምጺእና ዕጣን ናይ ቤተ መቕደስ ከም ዝሽትቶም እንተ ዘይጌርና፡ ቤተ ክርስቲያን ኣምጺእናዮም ንቅዱሳን ሥዕላት ፈልዮም እንተ ዘይፈሊጦም፡ ቤተ ክርስቲያን ኣምጺእናዮም ኣብ ቅድሚ ታቦት እንተ ዘይሰጊዶም፡ ቤተ ክርስቲያን መጺኦም ንዙርያኣ ከቢሞም ማዕጾኣ እንተ ዘይተሳሊሞም፡ ካብ መን ደኣ ክመሃሩ እዮም? እዞም ቆልዑ እዚኦም ካብ ሕፃንነቶም ኣዳራሽ ለሚዶም ኣብ ኣዳራሽ እንተተረፉ ተሓተትቲ ንሕና ዶ ኣይኮንናን ኢና? እዚ እዩ እምበኣር ናይ ዘመንና ዓቢይ ፈተና። 

ፕሮቴስታንት ኳሕኵሖም ኳሕኵሖም ኣይከኣሉን፡ እስማዔላውያን (እስላም) ሓሪዶም ኣቃጺሎም ኣይከኣሉን፡ ኣብ መወዳእታ ሰይጣን ካብ ውሽጢ ሰባት ኣተንሥአ። ..ነዚ ኵልና ሕጂ መዝሙር ኢልና ንሰምዖ ዘለና ንዝተወሰነ ዓመታት ደው ኣቢልና፡ ከምዚ ኣቐዲሞም ኣቦና ከዚሙልና ዚጸንሑ ያሬዳዊ መዝሙር እንተ ንሰምዕሞ እንተ ንስተኻኸል ከመይ ጽቡቕ ኔሩ። …..ይቕጽል